اسئلة مقابلات البنوك - من مشاركات الاعضاء

بواسطة SHGHLNY SHOKRAN بتاريخ الأحد، 26 مايو، 2013 | الأحد, مايو 26, 2013



اسئلة مقابلات البنوك
أزيكم يا شباب شغلني شكرا أنا عندي فكرة كويسة جدا ان كل واحد فينا عمل مقابلة في بنك أو أمتحن في بنك قبل كدة يدخل يشارك ويكتب الاسئلة الي واجهته وأزاي جاوبها وأحنا نشارك في الأجابة كمان وأنا هبدأ بنفسي

في البداية أنا كنت شغال سيلز في بنك باركليز ودلوقتي credit analyst ‎‏ في بنك التعمير والاسكان

وهبدأ ببنك باركليز وانا بصراحة مسمي بنك باركليز ده مدرسة
وكان عبارة عن مقابلة واحدة
انا روحت قدمت في فرع البنك في سانت فاطيمة وكانت الاسئلة مع الاستاذ شريف نصر دخلت عليه مبتسم كدة فيقولي محمد عرفني بنفسك بالانجلش ؟ بيقولي أنت ليه عايز تشتغل سيلز ؟
طيب أنت خريج تجارة أنجلش وشعبة محاسبة لية سيلز ؟
تعرف أية عن بنك باركليز ؟
شايف نفسك فين بعد 5 سنين ؟
وحصل حاجة غريبة جدا طلع الموبايل بتاعة وقالي أنا عايزك تبعيلي الموبايل ده . وبص شوية كدة في السي في وقالي أنت ساكن في شارع أسمه عبد المنعم خاطر صح قولتله أه قالي طب ليه ساموه كدة
‏ وبعد شوية راح قالي صور البطاقة أنت معانا
وقعدت في بنك باركليز في المبيعات 6 شهور

وبعدها روحت الاسكان والتعمير وكانت مقابلة مع نائب العضو المنتدب وبصراحة كانت أقوي حاجة في حياتي
وهقولها بالتفصيل
كانت مع أ: حسين أسماعيل في قطاع المخاطر بالمناسبة يا جماعة أنا كنت مقدم بالبريد في شهر 12 /2009 وأتصلوا عليا في شهر يونيو /2010 يعني بعد مانسيت أصلا انا قصدي برضه انا محدش ييأس ولا يروح يقدم السي في ويقعد جنب التليفون في البيت بالليل مستني حد يكلمه
المهم روحت المقابلة وبصراحة كنت واخد راحتي ف النوم بقي ومذاكر كويس جدا لاني أتعلمت اني لازم أعرف انا مترشح لشغل أيه عشان اذاكر
المقابلة كانت قوية جدا جدا جدا جدا جدا جدا
سألني كل مايتعلق بالمواد دي
محاسبة مالية أولي جامعة وتمويل سنة تالته ومنشأت في رابعة جامعة
ودي كانت الاسئلة

تعرف أية عن الميزان التجاري
أية الفرق بين ميزانية البنك والشركة
دور البنك المركزي
أيه المخصص والاحتياطي والفرق بينهم
تعرف أيه عن السهم والبورصة والسند والشيك والكمبيالة
وسألني كتير جدا في المؤاشرات المالية
وبعد ده كلة قالي خد أقرا الورقة دي وقولي فهمت أية والورقة كانت عن الازمة المالية العالمية وانا جاوبته والحمد لله

يارب أكون قدرت أساعد حد ويارب ديما نكون من أنفع الناس